اسلام آباد ہائیکورٹ نے این ایچ اے کو شہریوں سے اضافی ٹول ٹیکس لینے سے روک دیا

شائع 03 جولائ 2026 03:46pm

اسلام آباد ہائی کورٹ نے نیشنل ہائی وے اتھارٹی (این ایچ اے) کی جانب سے نان ایم ٹیگ اور کم بیلنس والے ایم ٹیگ رکھنے والی گاڑیوں پر 50 فیصد اضافی ٹول ٹیکس وصول کرنے کا نوٹیفکیشن آئندہ سماعت تک معطل کر دیا ہے۔ عدالت نے این ایچ اے کو اضافی ٹول وصول کرنے سے روکتے ہوئے وزارتِ مواصلات سمیت دیگر فریقین کو نوٹس جاری کر دیے ہیں۔

اسلام آباد ہائی کورٹ میں جمعے کے روز ایڈووکیٹ جلال حیدر کی جانب سے دائر درخواست کی سماعت ہوئی۔ جسٹس ارباب محمد طاہر نے درخواست کی سماعت کی جب کہ ایڈووکیٹ محمد جلال حیدر عدالت میں پیش ہوئے۔

سماعت کے دوران عدالت نے این ایچ اے کو شہریوں سے اضافی ٹول ٹیکس وصول کرنے سے روک دیا اور 30 مئی 2025 کے نوٹیفکیشن کو آئندہ سماعت تک معطل کرنے کا حکم جاری کیا ہے۔

واضح رہے کہ این ایچ اے کی جانب سے جاری کیے گئے نوٹیفکیشن کے تحت موٹروے استعمال کرنے والی ان گاڑیوں پر 50 فیصد اضافی ٹول سرچارج عائد کیا گیا تھا جو ایم ٹیگ کے بغیر سفر کر رہی ہوں یا جن کے ایم ٹیگ میں مطلوبہ بیلنس موجود نہ ہو۔

درخواست میں مؤقف اختیار کیا گیا ہے کہ نیشنل ہائی وے اتھارٹی ایکٹ کی ’دفعہ 10‘ این ایچ اے کو صرف ٹول ٹیکس وصول کرنے کا اختیار دیتی ہے، تاہم قانون میں ایسی کسی بھی قسم کی اضافی سزا یا جرمانہ عائد کرنے کا اختیار فراہم نہیں کیا گیا۔

درخواست میں کہا گیا ہے کہ یہ سرچارج کسی قانونی بنیاد کے بغیر نافذ کیا گیا اور این ایچ اے نے اپنے قانونی اختیارات سے تجاوز کیا ہے۔

درخواست میں مزید مؤقف اختیار کیا گیا ہے کہ یہ اقدام پاکستان کے آئین کے آرٹیکل 4، 18، 24 اور 25 کی خلاف ورزی ہے۔ درخواست میں عدالت سے استدعا کی گئی تھی کہ این ایچ اے کو ایم ٹیگ بیلنس سسٹم اور اس کے نفاذ کے مکمل طریقہ کار کی تفصیلات عدالت کے سامنے پیش کرنے کا حکم دیا جائے جب کہ 30 مئی 2025 کے نوٹیفکیشن کے تحت وصول کیے گئے تمام اضافی چارجز واپس کرنے کی بھی ہدایت جاری کی جائے۔

عدالت نے این ایچ اے، وزارتِ مواصلات اور دیگر متعلقہ فریقین کو نوٹس جاری کرتے ہوئے 3 اگست تک جواب جمع کرانے کی ہدایت کی اور کیس کی آئندہ سماعت کے لیے 3 اگست کی تاریخ مقرر کی ہے۔