امریکا کی قطر، کویت، امارات اور اسرائیل کو مزید اسلحہ فروخت کی منظوری

امریکا نے مشرقِ وسطیٰ میں اپنے اتحادی ممالک کو مجموعی طور پر 8.6 ارب ڈالر مالیت کے جدید اسلحے اور دفاعی نظام فروخت کرنے کی منظوری دے دی ہے، جس کا مقصد خطے میں دفاعی صلاحیت کو مضبوط بنانا بتایا جا رہا ہے۔

امریکی حکام کے مطابق اس بڑے دفاعی پیکج کے تحت اسرائیل، قطر، کویت اور متحدہ عرب امارات کو جدید ہتھیار، دفاعی نظام اور جدید فوجی ٹیکنالوجی فراہم کی جائے گی۔

حکام کا کہنا ہے کہ اس معاہدے کے تحت قطر کو تقریباً 4.01 ارب ڈالر جبکہ کویت کو 2.5 ارب ڈالر مالیت کا اسلحہ فراہم کیا جائے گا، جبکہ باقی رقم دیگر اتحادی ممالک کے لیے مختص کی گئی ہے۔

امریکی حکام کے مطابق اس پیکج میں جدید دفاعی سازوسامان، نگرانی کے نظام، اور جدید فوجی ٹیکنالوجی شامل ہے، جس کا مقصد اتحادی ممالک کی دفاعی صلاحیت میں اضافہ اور خطے میں سکیورٹی تعاون کو فروغ دینا ہے۔

یہ پیش رفت ایسے وقت میں سامنے آئی ہے جب مشرقِ وسطیٰ میں کشیدگی برقرار ہے اور امریکا اپنے اتحادیوں کے ساتھ دفاعی تعاون کو مزید مستحکم کر رہا ہے۔