ایران نے ڈیل کے لیے رابطہ کیا ہے: صدر ٹرمپ کا دعویٰ

شائع 14 اپريل 2026 08:50am

امریکا اور ایران کے درمیان ممکنہ معاہدے سے متعلق اہم پیش رفت سامنے آئی ہے، جہاں امریکی صدر ڈونلڈ ٹرمپ نے عندیہ دیا ہے کہ دونوں ممالک کے درمیان ڈیل کے امکانات ابھی مکمل طور پر ختم نہیں ہوئے۔

عرب نشریاتی ادارے الجزیرہ کے مطابق صدر ٹرمپ نے دعویٰ کیا ہے کہ آج صبح انہیں ایران کی جانب سے درست اور مناسب لوگوں کی کال موصول ہوئی ہے، جو امریکا کے ساتھ معاہدہ کرنا چاہتے ہیں۔

ٹرمپ کا کہنا تھا کہ ایرانی نمائندے اس ڈیل میں سنجیدہ دلچسپی رکھتے ہیں اور اسے آگے بڑھانا چاہتے ہیں۔

امریکی صدر نے مزید کہا کہ ایران کی جانب سے رابطہ ایک مثبت اشارہ ہے، جو اس بات کی نشاندہی کرتا ہے کہ معاملات کو بات چیت کے ذریعے حل کرنے کی گنجائش اب بھی موجود ہے۔

واشنگٹن ڈی سی سے رپورٹ کرتے ہوئے صحافی جان ہولمین کے مطابق امریکی صدر نے حال ہی میں بیان دیا کہ ایران بات چیت کا خواہاں ہے۔

اس مؤقف کی تائید امریکی نائب صدر جے ڈی وینس نے بھی کی، جو گزشتہ ہفتے اسلام آباد میں ہونے والے مذاکرات کی قیادت کر رہے تھے۔ جے ڈی وینس نے فاکس نیوز سے گفتگو میں کہا کہ ایک بڑا معاہدہ ممکن ہے اور اس حوالے سے پیش رفت بھی ہوئی ہے۔

رپورٹس کے مطابق امریکا نے ایران کو یورینیم افزودگی پر 20 سالہ پابندی (moratorium) کی تجویز دی تھی، جس کے جواب میں ایران نے پیر کے روز جوابی پیشکش کرتے ہوئے اس مدت کو 20 سال کے بجائے 5 سال کرنے کی بات کی، تاہم اس تجویز کو مسترد کر دیا گیا۔

یہ پیش رفت اس بات کی نشاندہی کرتی ہے کہ دونوں ممالک کے درمیان باقاعدہ مذاکراتی عمل جاری ہے، جس میں تجاویز اور جوابی تجاویز کا تبادلہ ہو رہا ہے۔

رپورٹ کے مطابق کچھ عرصہ قبل تک صورتحال یہ تھی کہ امریکا کی جانب سے سخت مطالبات کیے جا رہے تھے جبکہ ایران ان مطالبات کو مکمل طور پر مسترد کر رہا تھا، تاہم اب حالات میں کچھ نرمی دکھائی دے رہی ہے۔