ایرانی شہری امریکی حملوں سے بجلی گھروں، پلوں کی حفاظت کے لیے نکل آئے

شائع 07 اپريل 2026 08:57pm

شمال مغربی ایران کے شہر تبریز سمیت ملک کے دیگر حصوں میں ایرانی شہری امریکی حملوں کے خدشات کے پیشِ نظر اہم انفراسٹرکچر کی حفاظت کے لیے سڑکوں پر نکل آئے۔ عوام نے بجلی گھروں اور پلوں کے گرد انسانی زنجیریں بنا کر ممکنہ حملوں کے خلاف مزاحمت کا پیغام دیا۔

غیر ملکی میڈیا کے مطابق ایرانی نائب وزیر برائے نوجوان امور علیرضا رہیمی نے نوجوانوں، طلبہ، فنکاروں اور کھلاڑیوں سے اپیل کی تھی کہ وہ ریاستی اہمیت کے حامل تنصیبات کے تحفظ کے لیے اس اقدام میں حصہ لیں۔

یہ مظاہرے امریکی صدر ڈونلڈ ٹرمپ کی جانب سے ایران کو آبنائے ہرمز کھولنے نہ دینے پر انفراسٹرکچر پر حملے کی دھمکی کے بعد سامنے آئے ہیں، جس سے خطے میں کشیدگی میں اضافہ ہوا ہے۔

ایرانی حکام نے انسانی زنجیروں کو “روشن مستقبل کے لیے ایرانی نوجوانوں کی کوشش” قرار دیا ہے اور اسے ملکی اثاثوں کے تحفظ کے طور پر پیش کیا گیا ہے، جبکہ شہریوں کی موجودگی کو عوامی یکجہتی اور قومی حفاظت کے جذبات کی علامت قرار دیا گیا ہے۔