طارق رحمان بنگلہ دیش کی وزارتِ عظمیٰ کا حلف آج اٹھائیں گے

شائع 17 فروری 2026 08:59am

بنگلا دیش کی سیاست میں اہم پیش رفت سامنے آئی ہے جہاں طارق رحمان آج وزارتِ عظمیٰ کے عہدے کا حلف اٹھائیں گے۔ حلف برداری کی تقریب دارالحکومت ڈھاکا میں منعقد ہوگی جس میں ملکی و غیر ملکی شخصیات کی شرکت متوقع ہے۔

رپورٹس کے مطابق بنگلہ دیش نیشنلسٹ پارٹی (بی این پی) اور اس کے اتحادیوں نے حالیہ عام انتخابات میں دو سو بارہ نشستیں حاصل کر کے پارلیمان میں دو تہائی اکثریت حاصل کی، جس کے بعد حکومت سازی کی راہ ہموار ہوئی۔

بی این پی کی واضح برتری کو مبصرین بنگلا دیش کی سیاست میں بڑی تبدیلی قرار دے رہے ہیں۔

نومنتخب وزیرِاعظم طارق رحمان آج باقاعدہ طور پر وزارتِ عظمیٰ کا منصب سنبھالیں گے اور نئی کابینہ کے خدوخال بھی جلد سامنے آنے کا امکان ہے۔

حلف برداری کی تقریب میں پاکستان کی نمائندگی وفاقی وزیر منصوبہ بندی احسن اقبال کریں گے۔

احسن اقبال تقریب میں شرکت کے لیے ڈھاکا پہنچ چکے ہیں اور وہ وزیرِاعظم پاکستان کی نمائندگی کرتے ہوئے بنگلادیشی قیادت اور اعلیٰ حکام سے اہم ملاقاتیں بھی کریں گے۔

واضح رہے کہ بنگلادیش نیشنلسٹ پارٹی نے حالیہ انتخابات میں اپنے حامیوں کے ساتھ مل کر دو تہائی اکثریت حاصل کی تھی۔ بی این پی اتحاد نے 299 میں سے 212 نشستیں حاصل کی تھیں۔